المتابعون

أسباب تعادل الزمالك أمام الانتاج وأسباب سوء آداء اللاعبين والجهاز الفني وحلها ..!!

أسباب تعادل الزمالك امام الانتاج ومدي السوء بالزمالك فى الفترة الأخيرة

ماهي أسباب تعادل الزمالك امام الانتاج الحربي ..؟؟
ما هي أسباب سوء آداء الزمالك فى مباراة الانتاج الحربي ..؟؟ 
هل التعادل الثمين الذي حصل عليه الانتاج الحربي والذي قد يعيد المنافسة مره أخري على بطولة الدوري المصري ؟؟
هل التعادل بين الزمالك والانتاج الحربي سينجي الانتاج الحربي من الهبوط الى دوري المظاليم ..؟

أسئلة عديدة ينتظر عشاق وجماهير الزمالك الرد عليها من مسئولي الزمالك ومن المدير الفني خاصة ...!!

دعونا نستعرض الأخطاء الواضحة فى الزمالك وحلها قد أطيل عليكم ولكن ما الحل نحن نعشق الزمالك ونتمني أن يكون أفضل نادي فى الكون فلابد لنا أن نناقش الاخطاء والمشاكل المتواجدة بالفريق .

أولاٌ أسباب التعادل فى مباراة الزمالك والانتاج الحربي :

هو سوء أداء لاعبي الزمالك وليس طريقة او اداء الانتاج او تشكيل الانتاج فى مباراة الزمالك بل وحقيقة الانتاج الحربي لم يكن مميزاٌ فى مباراة الزمالك ولكن الزمالك هو من كان الأسوء في التشكيل وفى الاداء أولا بالنسبة للتشكيل فهو تشكيل فوق السيئ بمراحل ولا اعلم كيف يفكر هذا المدرب السيئ جروس من وجهة نظري كيف يفكر فى هذا التشكيل ؟؟

أخطاء في التشكيل وفي آداء لاعبي الزمالك والكوارث المستمرة على مدي المباريات والتي ستتسبب فى ضياع الدوري :

  • الونش ليس المتمكن والمتميز لمركز الدفاع وهناك بديله بل وأقوي منه واسرع ويستعمل مخه قبل الالتحام مع المهاجم وهو اللاعب محمد عبدالغني ، لماذا لا يلعب محمد عبدالغني اساسياٌ بدل من الونش من وجهة نظري الونش مدافع غبي اعطي للانتاج ضربة جزاء مجانية بحركة غبية وبخطأ قاتل وتعمد الضغط على رجل المهاجم فى وضع متحرك ( مع العلم المهاجم اى لمسة ليه فى وضع الحركة هايقع والحكم هيحسبله وكان الحل فى ايد الونش سهل وسريع كان ممكن يهوش للكورة كأنه هايشوط المدافع ساعتها هايخاف الكرة تيجي فى وشه هايسيبها لكن مش اروح ادوس على رجله ومش عايز الحكم يحسبله  ......؟؟ .
  • محمد ابراهيم لاعب وسط الزمالك دا مش لاعب 90 دقيقة كاملة  دا كبيره اخر 30 دقيقة مش اكتر من كدا وبذلك لو لاحظنا نص ملعب الزمالك بعد اول 30 دقيقة تقريبا شبه انفتح نهائي ولاعبي الانتاج سيطروا عليه تماما ، الكلام دا مكنش بيبان ليه  ؟ فى وجود طارق حامد بيلعب قلب ملعب وبيساعد لاعب نصف الملعب على الانتقال من المستوي الدفاعي الى الهجومي بالبينيات اللى دايما يعملها طارق حامد النهاردة علشان طارق حامد غاب اتكشف نص ملعب الزمالك بسهولة وبقى عامل زى السويقة .
  • حميد أحداد لاعب ممتاز ولكن ليس لديه خبرة فى التعامل اصلاٌ مع الكرة واضاع كرة هدف محقق ( دخل على الكورة واخد قرارين يلعب برجلة ولا يلعب بدماغه وبذلك اتلخفن الكورة لا جت فى رجله ولا جت فى دماغه ، أكتر من كورة بالشكل دا يضيعها حميد أحداد مع إني راس الحربة دا شغلته فى الملعب انه يحرز أهداف فقط ميعملش اكتر من كدا  ؟

اللاعب يوسف اوباما اللاعب المتميز فردياٌ فقط

  • يوسف أوباما معندوش حاجة اسمها يلعب مع اللاعبين فقط بيلعب فردي ومستواه بقى فوق الزفت وشغلته انه يصنع للمهاجم او لراس الحربة متهيقلي يوسف أوباما ملمسش ولا كرة صحيحة لراس الحربة او فى المباراة كلها  ؟ دا نازل يعمل ايه لما انتا عندك بديل افضل منه بكتير  ؟ كان ممكن يشارك وممكن يفيدك من بداية المباراة ؟ سؤال لجروس ؟؟
  • لاعبي الزمالك بصفه عامه عندهم افراط فى مباصاة الكورة يعنى مفيش تقدير للكورة مفيش كورة بتروح للاعب صح يا اما طويلة يا اما قصيرة ولاحظنا دا كتير جدا فى باصات الونش وعبدالله جمعة ويوسف أوباما واكثرهم محمد ابراهيم اللى كان بيعمل كل الصعب وفى الاخر يباصيها خطأ .
  • لاعبي الزمالك معندهمش حتي انزل واستلم كل لاعب عايز يستخبي ورا لاعب الخصم والكورة تجيله لحد عنده  ؟ ليه لاعبي الوسط ميعملوش الانتقالة اللي مكلفين بيها اللى هيا نقل الكرة من الدفاع للهجوم ودي شغلة لاعبي نصف الملعب  ؟؟؟؟ تقريبا مكنتش اصلا موجودة النهاردة فى الملعب ...؟؟ فين لاعبي نصف الملعب تقريباٌ كانوا فى ماتش تاني غير  بتاع الانتاج الحربي ..؟ فين جروس من الكلام دا ... تقريباٌ كان بيقود فريق الانتاج الحربي مش الزمالك ..؟؟؟
  • لاعبي الهجوم فى الزمالك بيعملوا كل حاجة صعبة وعند الفنش يرحمنا ربنا الكورة بتتشاط بشكل غبي ووحش اوى اوى اوي فوق الغاية بكتير ، تحس انى اللاعب بيشوط طوبة او حجر كبير .
  • لاعبي هجوم الزمالك ولاعبي الزمالك عامة مفيش ترتيب فى استلام وتسليم الكورة بسهولة يعنى لاعب استلم الكورة لاعب تاني يظهرله يسلمه ويستلم مش يستني لما الكورة تتخطف منه وبعدين حتي ميرجعش يدافع النهاردة لاعبي الانتاج الحربي كان ممكن يفوزوا على الزمالك كتير مش بهدف واحد لولا ستر ربنا .

طيب والحل ........؟؟؟

مش معني كل المشاكل اللى فاتت دي انى الزمالك فريق ضعيف او سيئ لكن محتاج تعديلات كتير اوي اوي أوي ودي على مدرب الزمالك اللى هوا امير عزمي مجاهد وانا بناشد من هنا :
  • لاعبي الزمالك محتاجين يتعلموا يستلموا الكورة ويسلمها صح .
  • لاعبي الزمالك محتاجين يقدروا الكورة بحيث تروح للاعب صحيحة وفى المكان اللى متواجد فيه  .
  • لاعبي الزمالك محتاجين يتدربوا على ازاي اللاعب يهاجم ويرجع يدافع وفى نفس الوقت يقوم بواجبة على أكمل وجه .
  • لاعبي الزمالك محتاجين ينظموا نفسهم اللى فيه لاعيبة بتخلص نفسها فى اول 30 دقيقة وبالتالي بيقف ومنها مكانه بيتفتح فى الملعب .
  • لاعبي وسط الزمالك محتاجين يتعلموا اني شغلتهم فى الملعب نقل الملعب من الدفاع للهجوم بسرعة .
  • لاعبي الزمالك محتاجين يتعلموا سرعة الارتداد فى الهجمة سواء كانت علينا .
  • لاعبي الزمالك محتاجين يبطلوا التفاههة شوية فى اني اللاعب بيروح يحتك بالحكم او باللاعب وبياخد انذار مجاني يا اما من اعتراض علي الحكم بدون داعي او من احتكاك مع لاعب ملوش اصلا داعي انه يتعمل الاحتكاك دا لكن بيحمل الاعب انذار وبالتالي بيحمل الفريق فى اي لحظة طرد اللاعب وممكن غيابة من المباراة اللى بعدها .
  • جروس بتاع لحمة الراس دا محتاج يعدل كتير فى التشكيل المعفن اللى بيلعب بيه دا فيه لعيبة على الدكة محتاجة نص فرصة علشان تثبت نفسها زى أيمن حفني ومدبولي وحازم امام وعنتر اقسم بالله اللاعيبة دي محتاجة فرصة مش اكتر محتاجة مشاركة .
  • محتاج كمان جروس يستخدم الثلاث تبديلات فى المباراة حتي لو على سبيل اضاعة الوقت زى ماحصل فى مباراة نهضة بركان فى مباراة الذهاب لو نزل التغيير التالت كان هايضيع بيه وقت وكان ممكن الهدف بتاع بركان ميجيش بسبب ضياع الوقت  .

نتيجة عدم الاهتمام واللامبالاه قد تسبب كوارث للزمالك حتي نهاية الدوري :

وفى الاخير لاعبي الزمالك فى استهتار مستمر وفى اجهاد مستمر برغم انى اللاعب بمجرد انه ينام ويرتاح 6 ساعات متواصلة بيجدد نشاطه من جديد مش محتاجين سنة ولا حاجة علشان اللاعبين ترتاح وكفاية الموسم اللى فات ضاع الزمالك فيه بسبب عدم الاستقرار فى الجهاز الفني وفى اللاعبين وفى الادارة .

الحاجة الأخير واللي اتمني من جهاز وادارة ورئاسة نادي الزمالك أنه ميديش الاعلام اهتمام يعنى بلاش شتايم بلاش رد على اي حد بيشتم الملعب فى الرياضة دائماٌ مايكون الفيصل انا اتشتمت أقدر ارد فى الملعب زى مابيعمل بيراميدز وزي مابيعمل عبدالله السعيد فى الملعب ، محتاجين نبعد عن الانظار شوية ، مش كل شوية تصريح فى الاعلام نخلي اللى يسوي واللى ميسواش يمسك فى سيرة الزمالك ومنها كلمة غلط من هنا على كلمة غلط من هنا تسير جدل ومنها مشكلة كبيرة .

متنساش لو عجبك الموضوع شاركه مع أصحابك على صفحتك فى مواقع التواصل

ان شاء الله الزمالك هايبقى افضل واحسن نادي فى مصر 
تمنياتي بالخير دائما لمجلس ادارة الزمالك 
ربنا يوفقكم بالخير دائما 
#الزمالك_بطل_الدوري.
مبدع عربي | عاشق الزمالك

Mobd3
كاتب المقالة
كاتب ومحرر اخبار اعمل في موقع مبدع عربي | منصة الكورة العربية والأوروبية .

جديد قسم : الدوري المصري

إرسال تعليق